Monday, July 28, 2014

නැග්ගොත් දෙබලක්!!!


"කොළොම් තොටේ නුඹ ඉන්නා ඉසව්වේ කිරිල්ලියෝ ඉගිලෙනවලු නිදැල්ලේ"
 ඔන්න ඔහොම කියලා මගේ රත්තරන් අම්මා තමන්ගේ කාලකණ්නි පුතාට
බුදු සරණයි පරිස්සමට ගිහින් වරෙන් කියල කිව්වා.
නිවාඩුවට ගෙදර ආපු ලොකු අම්මාගේ පුතා මධු අයියත් සෙට් කරන් කොළොම්පුර ආක්‍රමණය කරන්නයි ලෑස්තිය. මධු අයියා නෑදෑ කමට "ලොකු අම්මගේ ලොකු පුතා" උනාට මගේම අයියා වගේ.
 මටයි ඌටයි දෙන්නටම කටහැකර නංගි කෙනෙක් එක බඩ වැල කඩන් ආපු එක සහ සහොදරයෝ නොසිටීම යන පොදු ධර්මතාවය මත කලිසමේ හුජ්ජා කරගන්නා කාලේ සිටම ඌයි මායි අයියා මලෝ වගේ.

ඉලක්කම් 4ක් කරකවලා පශ්චාත්භාගය පුච්චා ගැනීමේ පුටුවක ඉදගන්න තියන තරගෙක 100 දෙනාගේ මූලික වටේට එන්න කියලා තිබ්බ නිසා කාලෙකින් කොළඹ ගිහින් එන්න බැරි උන නිසයි
අරුයි මායි උදේ පාන්දර තුනට විතර නැගිටලා ,ජංගි කොට දෙකයි වතුර බොතලෙයි දාපු බෑග් එක අතට  අරන් පාරට බහින්න හදද්දී කොහෙද හිටිය අවලම්භිත , දුස්‍රාවි , සෙපලපෝඩා හූනෙක් "චුක් චුක්" ගෑවා.
ඒ වෙලාවේ හැටියට හුනෝ නෙවෙ අහල පහල ඉන්න ජිගිරිබිල්ලොත් කෑ නොගැහුවොත් තමා අවුල.

"උදේ පාන්දර ලයිට් දාලා හුනා උනත් ඇහැරුවම ඌට අපේ ආච්චිගෙ මහත්තයගේ දුවලගේ පුතාලා මතක් වෙන එක සාධරණයි බං"

කියපු අයියයි මායි අම්මටයි තාත්තටයි වැදලා පාරට වෙලා කොලඹට ෆ්ලයි කරන බස් එකක් එනකන්  හිටියා
මේ කුම්භකර්ණයා හිටන් නිදි . හීනෙනුත් වෙලෙන් එහා පැත්තෙ මාර ගහ ගාව ලිසි ආච්චිගේ ලොකු දුවගේ නම මුමුණනවා.

"කෙල්ලෝ හැමෝම එකයි බං ඔකුන්ගේ වෙනසක් නෑ බං. ඔකුන්ට පදිරි වෙවි පස්සෙන් යන්න එපා බං. "

අනේ යකෝ කඩේ ගාවදි අපේ ලොකු අම්මව මතක් කරපු ඒකි ගැන තාම මූ හිතනවා. අනේ ඉතින් ගෑනු ගැන වෙන වෙලාවට මට මහාචර්ය ටෝක් දෙන මූ නේ මේ කියලා ඇහැරෙව්වා.

"ඒ නැගිටහන්!"

" අඩේ කොහෙද කොට්ටාවෙද? බහිමු බහිමු"

"කොට්ටාවට යන්න තියා බස් එකටවත් නැග්ගේ නෑ තාම."

"පට්ට හීනේ යකෝ තෝ මාව ඇහැරුවානේ"

" ඇයි මේ පාර නිලූ මොනවද කිව්වේ , ?"

"උබ කොහොමද ඒක දන්නේ? "

" නිදාගත්තම හරි අයියාගේ ඔය මහචාර්ය ටෝක් දෙන දිව බොරු කියන්නැති එක ගැන සන්තොසයි"

වෙලාවට බස් එකක් ආවා  අත දාල නවත්තපු මං නින්දත් නොනින්දත් අතර හිටි අපේ ගගනගාමියවත් උස්සගෙන වගේ බස් එකට නග්ගගත්තා.
මට ඒ වෙලේ නම් ඔක්කොම අත ඇරලා වනගත වෙන්න හිතුනා. හපොයි! නිදාගත්තම මිනුස්සු මෙච්චර කැතද? එක එකා එක එක ස්ටයිල් එකට නිදි. එකෙක් නිදි, ඌ කට ඇරන් ,
උණ්ඩුක පුච්චේ ඇතුලේ ඌ පෙරේද උදේට කාපු වඩේ එකේ පරිප්පු ඇට දෙක තුනකුත් පේනවා .

 තව කෙල්ලෙක් නිදි එකිගේ කොල්ලා කියන එකාගේ උරහිසට ඔලුව තියන්
අහෝ! සංසාරේ අරකිගෙ කට කෙල ඔක්කොම අරුගේ අලුත ගත්ත ෂර්ට් එකේ . ඌත් හොද වෙලාවට නිදි. ඌ වැරදිලාවත් ඒ වෙලේ ඇහැරලා  හිටියනම් තවත් අහිංසක ආදර කතාවක අවසානය.
කොහොමින් කොහොම හරි කලකිරුණ සසර අතට අරන් ෂීට් එකක් හොයන් ගිහින් වාඩි උනා. ජනෙල්ලේ ලග මං වාඩි උනා.

අයියා නම් ඉදගත්තේ ගොරවපු ගමන් . වාඩිඋන ගමන් ඌ  kolaveri ගැහුවා.

කොන්දොස්තර අයියා  ලගට ඇවිත් කොහෙට්ටද මල්ලි කියලා "බරූස් බරූස්" ගාල ටිකට් දෙක කඩලා ඉතිරි රුපියල් 15 පස්සේ දෙන්නම් කිව්වා.
 ඒ 15 දානයක් දුන්නා කියලා හිතාගත්තේ ඔය 15 ඉල්ලන්න ගියොත් 1000ක් කුණු කතා අහලා අපේ ලේත් නරක් කරන් උදේ පාන්දරම මගේ ගමන ඇට්ටකුණා කරගන්න බැරි නිසයි.
ඔහොම හිටි මටත් ටික ටික නිදි දෙව්දුව හාදු දෙන්න ගත්තා. මොකෙක් වුනත් කෙල්ලෙක් නේ කියලා මාත් දුන්න කිස් එක මෙව්ව කරගත්තා.  මොනා වුනත් ගෑණු පරාණයක් කියලා එකක් මගේ ජිවිතේට ඇන්ටර් වෙන්නේ ඔය කියන නිදි දෙව්දුව විතරනේ.
ඒ නිසා නෑ බෑ නොකියා දෙන ඕනේ දෙයක් ගන්නවා .

"අනේ පැටියො මං ඔයාට ගොඩක් ආදරෙයි සුදු"

"ඔයා කාජල් නෙවෙ කවුරු උනත් මට බෑ ඔයාට කැමති වෙන්න"

"අනේ ඇයි පැටියො ඔයා ඔහොම කියන්නේ ?" ඔයා දන්නෑ සුදු මං ඔයා ගැන කොච්චර හිතනවද කියල, අනී මේ රෝස මල වගෙ මගේ ආදරෙත්, පිවිතුරුයි."

"අනේ පැටියෝ #!@%^&, පම්ප් එකක් දාන්න ඕනේ නම් දාල එන්න වැඩි වෙලා නවත්තන්නේ නෑ"

අඩො මෙන්න කාජල් රෝස මලක් දීලා පම්ප් එකක් දාන්න කතා කරනවා!

"ඒ ඒ නැගිටහන් "

"අම්මට උඩු! "

"අම්මට උඩු නෙවෙ බං මොනා හරි කාලා එමු. පරකඩුවටත් ඇවිත්"

"මාර හීනේ ඕයි කාජල් මගෙන් යාලු වෙන්න ඇහුවා! මං ලොකු ලයින් දිදි හිටියේ හා කියන්න හදද්දිමයි මේ කොන්දා ඇහැරෙව්වේ, ෂික් :( "

"උබට සුවර්ද කාජල් කියලා? මෙහෙ වරෙන් මොනා හරි කාලා ඉමු"

මාලු නැති අල මාලු බනිස් දෙකක් කාලා කහට නැති සීනි වතුර එක දාපු කෝප්පේ වටේ හිටපු කූඹි ටික අයින් කරලා ඒකත් බීලා , රු.160ත් ගෙව්වා

"දැන් කෑමත් සෑහෙන්න ගණන් නේ? "
 "ඔව් මහත්තයෝ පෙරෙදා ඩීසල් ගණන් ගියානේ"

ආයේ මොකුත් කියන්නැතුව කට වහගත්ත අයියා මගේ මූණ දිහා කබලෙන් ලිපට වැටුන මිනිහට ගොනා ඇනලා වගේ බලලා බිල සෙට්ල් කරලා කඩේ පිටිපස්සේ ලැට් එකට සෙට් වුනේ ලොකු බරක් නිදහස් කරන්න.
අම්මපා එතෙන්ට ආවට වඩා හොදයි කලිසමේ දාගන්නවා. ඒකට එහා පැත්තේ මිනුස්සු උයනවා , ඒක දැකලා බඩ නිකන් ආතල් එකක් දෙනවා වගේ. හිත හදාගෙන මාලු බනිස් කෑවේ නෑ වගේ බඩත් රවට්ටගෙන බරත් අඩු කරන් එලියට බැස්ස ගමන් අයියා කිව්වා

"මං ඒකනේ කිව්වේ අර ජම්බෝල ගහ එහා පැත්තට අල්ලමු කියලා, ඒක දැකල පෙරේදා කාපු එවත් එලියට එන්න වගේ"

එහෙම දෙයක් කිව්වේ නැතැත් එහෙම් කිව්වා නම් හොදයි කියලා මටත් හිතුනා.

කොහොම හරි බස් එකට නැගල වාඩි වෙලා නිකන් පිටිපස්ස බලද්දි මෙන්න යකෝ ඉස්සෙල්ලා කට කෙල පෙරන් උන්න ගිනිගන්න හේනක වැදිරි සුරංගනාවි වගේ ඉන්නවා.
හිත නිකම් මෙව්වා වෙලා අරව්වා වෙලා ආයේ මෙව්වා වෙලා නිකම් මොකද්ද වෙලා ආපහු පීයවි සිහියට ආවා. කොහොමින් කොහමහරි බස් එක කොට්ටාවට ආවා, කොට්ටාවෙන් බැහැලා ගල්කිස්ස බස් එකත් අමාරුවෙන් හොයන් රත්මලානට ගොඩ බැස්සා.

"අඩෝ අපේ පැත්තේ ඇල් වතුර ටිකක් බීලා හිටියත් සැපයි නේ බං"

"සිරාවටම එක නම් ඇත්ත!, මේ ඒක නෙවෙ ඇයි අපේ පැත්තේ මෙච්චර ලස්සන කැලි නැත්තේ?"

"මෙහෙමයි, ඒකට හේතු දෙකක් තියනවා, එක, අපි වගේ එවුන් උපතින්ම ගේන කරුමයක් තියනවනේ, ඒක අපි ඉන්න තැනටත් බලපාලා, දෙක ඇත්තටම මුන් ලස්සන නෑ වතුර පාරක් ගැහුවානම් නැත්නම් වැලි කඩදාසියකින් මැද්දා නම් මුන්ගේ උපන් කලු පේනවා,
අනික මුන් යන්නේ ලොකු ලොකු වාහන ඇතුලේ අර ගාල තියන අගල් හයේ බදාමේ ලේසියෙන් ගැලවෙන්නේ නෑ"

"අර එද්දි අපේ ෂීට් එක පිටිපස්සේ හිටිය කෙල්ලව දැක්කද? ඒකි නිදන් ඉද්දි දැක්කද? ගෑණු හැමෝම එකයි බං නමින් විතරක් පොඩ්ඩක් වෙනස් වෙනවා, කරුමේ කියන්නේ සමහරුන්ගේ නමුත් එකයි"

අම්මට උඩු අයියත් චරිතේ තමා ඇ? මං හිතුවේ මට විතරයි ඒක මිටර් උනේ කියලා. කොහෙද ඉතින් චීත්ත කෑල්ලක් යන්තම් හෙල වුනත් ඇහෙ පොට යවාගෙන හරි බලන එක මට පුරුදු කලෙත් නෑදෑ කමට "අපේ ලොකු අම්මගේ පුතානේ"
ගුරා ලෙසටම තියරියට ප්‍රැක්ටිකල් කරන බව මට තේරුනා.
ඉස්සර සිප් එකට අහවල් එක අහු කරගන්න කාලෙත් පොඩි කෙල්ලෙක් ගියත් ඒ ඒ අර බලපං කියන එකේ දැන් කියන එක අරුමයක්ය!

කොහොමින් කොහොමහරි බස් එකෙන් බැහැලා ගිගින් උදේට ආපහු සයිවර් කඩේකින් රයිස් දෙකක් කාලා කෝක් දෙකක් ගහලා ආපු වැඩේ කරගත්තා.
අපි සෙට් උනේ ඔය අකුරු තුනේ ලොකු කඩෙකින් කාලා, ලොකු කඩෙකින් ජංගියක් අරන් පුටෝ එකක් ගහලා මූණූපොතේ දාන්න . මොන! මෙන්න හෙන ගගහා වහිනවා.
 අර තරගෙට ගියෙත් ගෙදර ඉන්න බැරි කමට ,කාලෙකින් කොළොඹ ආපු එක වතුරේ. මොනා කරන්න වීල් එකක් අරන් ගිහින් පාරේ අයිනේ කඩේකින් කැවා.

"මේ ඔන්න ඔහේ මේ භාගෙට තම්බපු බිත්තරෙ පුටො එකක් ගහලා ලොකු කඩෙකින් කැවා කියලා දාමුද අයියා?"

හිතේ හිරවෙච්ච දුක අන්න එහෙමයි එලියට පැන්නේ.

"වැඩක් නෑ බං ඔන්න ඔහේ මේක කාලා ඉක්මනට යමන්, මේ අද ආරි බාප්පලට කෝල් එකක් දීලා එහෙ යමන්ද කැළණියේ නේ"

"බෑ අයියා හෙට පෝයට දානයක් තියනවා , යන්න ඕනේ "

කාලා බිල ගෙවලා කොටුව බස් එකක් අල්ලන් නැග්ගා. කොටුවෙන් බහිනකම් ජිවතුන් අතර ඉන්නවද කිය කිය මං මාවම කොනිත්ත කොනිත්ත ගියේ. හැමවෙලෙම බස් එක ගිහින් ට්‍රයි කරන්නේ ඉස්සරහා තියන වාහනේ එක්ක තොලක් දාන්න.
මට හිතෙන්නේ එ බස් අංකල්ට පොඩි කාලෙ දුර මනින්න උගන්නල තියෙන්නෙ නූල, මිලිමිටරය වගේ ඒකක වලින්. ඇයි යකෝ ගිහින් බ්‍රේක් එක ගහනවා ඉස්සරහ වාහනේ ගෑවි නොගෑවි. බයටයි රස්නෙටයි දාඩිය වලින් නෑවිලා කොටුවෙන් බහිද්දි.
රුපියල් 20ක් දිලා ආයේ රීෆිල් උන එක ලූස් කරන් ඇතුලට යද්දි මෙන්න යකෝ බස් එකට නගින්න පෝලිම.
"හුටා! හෙට වෙසක් පොයනේ යකෝ, හිටගෙන තමා යන්න වෙන්නේ"
අයියා එහෙම කියද්දි කොටුවෙන් රු.2.75ට පැදුරක් අරන් එතන බුදියන්න හිතුනා ඇයි යකෝ ලෙසි පාසුවක්ය, පැය 6, 7ක් හිටගෙන ,
අඩොව්!!! දුවගෙන ගිහින් සෙමියක නැග්ග අපි දෙන්නට ගියා ආත්මේ වැරදිලා කරපු පිනක් පල දීලා වගේ අන්තිම ෂීට් එකේ ෂීට් 2ක් ලැබුනා.

"හා......................................"

ඉදලා ඉදලා කෑල්ලක් සෙට් උනාම , නැත්නම් බිම තිබිලා පර්ස් එකක් හම්බුනාම තියෙන සතුට මේක කියවන ඔයලා නිකන් හරි දන්නවා ඇතිනේ. මට නම් තාම එහෙම අත්දෑකීමක් නෑ,
 අල්ලපු ගෙදර පොඩි එකා තමා මටත් කිව්වේ කෑල්ලක් එහෙම සෙට් උනාම මාර හැපි කියලා, අන්න ඒ වගෙ සතුටක් වෙන්න ඕනේ ඒ වෙලෙ අපි දෙන්නට ෂීට් දෙක දැක්කම  දැණුනේ.
"හරි මහත්තයා නගින්න ! පිටිපස්සේ තව ඉඩ තියනවා"

අනේ යකෝ එහා පැත්තේ ඉන්න මනුස්සයගේ එක තට්ටමක් මගෙ කකුල උඩ මූ තව දාන්න යනවා. මුන්ට සීනි දාලා වෙඩි තියන්න ඕනේ කුඹි කාල මැරෙන්න.

වැඩක් නෑ කතා කරලා පිනට ෂීට් එකට හම්බුනාට පින බාගෙටද කොහෙද කරලා තියෙන්නේ
 ලබ්බ අස්ස තොවිලේ වගේ එනවා. අයියා කියපු කතාව ඇත්ත බස් එක ෆුල් පුරවලා තව ටිකක් පුරවලා. පව් කෙල්ලො එහෙම හිටන් යනවා. උන්ගේ අහිංසක මූන දැක්කම ෂීට් එක දෙන්නත් හිතයි. වැඩක් නෑ ඔකුන්ගේ මුණූ ලස්සන උනාට ඇතුල කැතයි,
අනික උන්ට දුන්නා කියලා  මං ඔකුන්ගෙ ඔක්කේ යන්නය? උන්ට ඔනෙ නම් අහයි නේ මගේ ඔක්කේ යන්න එතකොට හා කියනවා කියලා හිතාගත්තා!
ඔන්න ටික දුරක් යද්දි වැලේ එල්ලිලා ටාසන් එනවා වගේ, මස් රඹුටන් ගහක් ඇතුලේ ඉදන්  පොලිසියෙ මහත්තයෙක් පැන්නා. පැක් වෙලා හිටපු බස් එකෙ එවුන්ට තව මල අතේ.

"පොඩ්ඩක් එහාට වෙනවකෝ"

"හැමෝම මිනිස්සු ඇන්ටි , ඇන්ටීට සැපට යන්න ඔනේ නම් කාර් එකක් ගන්න."

බස් එක ඇතුලෙ මල විකාරයි, ඒ අස්සේ තව එකෙක්ට චූන් එකක් ගිහින් ඌ තාලෙට බෙල් එක ගහනවා.

"කවුද බැල් ගහන්නේ, මෙතන ආසවට බස් නැවැතුවේ නෑ, අපිටත් අමාරුයි තමා"

ආතල් එකේ ටිකට් එක කඩන් ආපු කොන්දොස්තර අංකල් එහෙම හිතේ දුකට කවි කියන්න ගත්තා!

ඔහොම ටික දුරක් යද්දි ආයෙත් නැවැත්තුවා.

"ලියාගෙන ආවේ මහත්තයෝ"

කියපු ඩ්‍රයිවර් අයියා ලෑල්ලට පාගලා තව ටිකක් පෑගුවා. මේ විලම්භීත අස්සේ අයියා කිසි සද්දයක් නෑ . පාඩුවේ යනවා මටත් පස්සේ තමා වැඩේ ජිගිරිබිරිස් උනේ, මූ කෑල්ලකට පැණිය දානවා. ඒකිත් මූ දිහා බල බල හිනා වෙනවා.
ප්‍රීටි සින්ටා ගහයි බැට් එකෙන්. පාලු වෙච්ච හතර කේන්දරෙට මෙන්න සිකුරා ලබලා. මොනා උනත් අයියානේ ,ඌට හරි ගියා කියන්නේ මට හරි ගියා වගේ නෙවෙයිනේ , ඇයි යකෝ ඌ කැල්ලක් දාගත්තා කියලා ඌ මට දෙනවය.

කමක් නෑ කියලා ඉරිසියාව පැත්තක දාලා ලේන්සුව  අරන් අරූගේ කට කොනේ පෙරිලා තිබ්බ කෙල ටික පිහදුවේ සහෝදර ප්‍රේමයට,

ඒක දැකල අරකිට හිනා.

"අනේ බං තොපිලා වගේ සහොදරයෝ ඉන්න කම් අපිට නම් කවදාවත් හරියන්නේ නෑ"

"අඩෝ ඔන්න ඔන්න උදව්වක් කලාම, මේ මොක උනත් ඒක පට්ට කෑල්ල ඕයි"

"මේ ඒ පාර තෝත් එකට පෙරන්න ගත්තද , අන්න එහා පැත්තේ ආච්චි කෙනෙක් හිටිය ආච්චිට පෙරපන්, මේක මං සින්නක්කර ලියන් ඉවරයි,
 බැරි ම නම් බලන් ඉන්න ඔය අංකලයට පොඩ්ඩක් එහෙට්ට මෙහෙට්ට වෙන්න කියලා ජනේලෙන් චූ කරලා කටවහන් බුදියගනින්"

"මේ ඔහොම නිකම් ඉදලා බෑ ඔයි! ඒකි කොහෙන් බහියිද දන්නේ නෑ. ගිහින් නොම්බරේ දීලා වරෙන්"

"මේක ඇතුලෙ කොහොම යන්නද බං?"

"එහෙම තමා ලව් කරද්දි පොඩ්ඩක් කට්ට කන්න ඕනෙ!"

"ආ! උබ දැන් මට පඩියා වගේ කියන්නේ උබ ලව් කරලා තියනවේ?"

"මං නම් නෑ තමා ඒත් ඔය නාට්‍ය වල හැම වෙලෙම කියන්නේ, උන් ඔහොමය කට්ට කන්නේ, හැටකින් විතර එක පාර ගුටි කනවා, "

"හරි හරි ගනින්කෝ කොලයක්,"

" ඔය මල ගේ ඇතුලේ මගුල් කතා කරනවා. මේ පු_ පොඩ්ඩක් තියගන්න බැරුව ඉන්නේ ,කොළයක් හොයනවා ඒ අස්සේ"

"මේ එහෙනම් ඔය ලේන්සුවවත් ගනින්කෝ"

"ආ ! අයියත් දැන් ඇන්කර් පීඩියා ප්‍රෝ බොනවා වගේ, ටිකිරි මොලේ ඇ"

කොහොමින් කොහොමහරි හිටන් හිටපු අයියා කෙනෙක්ගේ සාක්කුවේ තිබ්බ පෑනකුත් ඉල්ලන් අමාරුවෙන් ලේන්සුවේ නම්බරේ ලිව්වා. බලන් ඉන්න එවුන්ට හිනා.

"නමත් ලියන්න"
"හරි හරි හිටු පොඩ්ඩක්"
"නම පිටිපස්සෙන් ඩෙසිග්නේශන් අනන් මනන් ටිකත් ලියහන් "
"අනේ මේ නිකන් හිටු"
"අන්තිමට උද_____ කියලත් ලියහන්"
"දැන් කොහොම බං මේක දෙන්නේ?"
"ඒකි මෙතෙන්ට එන්නේ නෑ, ඔයා එතෙන්ට යන්න"
"අඩෝ තාම බලංගොඩ හිටන් යන්න වේද දන්නැ ඉතිරි ටික?"
"හිටන් ගියාට මොකෝ  මුදලට කල දේ අද සිට නොමිලේ, ගිහින් දෙනවා ඕක"

අයියා පොඩ්ඩක් හරි බරි ගැහිලා දගලද්දි මෙන්න යකෝ කලන්තේ වගේ හිටපු ගෑනු ටිකයි පිරිමි ටිකයි අලු ගහලා නැගිට්ට ෆීනික්ස් කුරුල්ලෝ ටික වගේ,

" හිටන් යන්න අමාරුයි නේද ආච්චි?"
"ඔව් පුතේ, දැන් කොච්චර දුර කියලද?"
"ආ ! එහෙනම් ආච්චි පොඩ්ඩක් වාඩි වෙන්න."
"පිං සිද්ද වෙයි පුතේ!"

අපේ අම්මා, මූ වගේ නසියර් කෙනෙක් දඹුලු ගිහින් තලගොයිත් මරන් ආවා.

ඒ අස්සේ කවුද එකෙක් කියනවා පිංවන්ත ළමයි, කියලා,
අනේ මුගේ පින මට වෙන වෙන තැන් වලින් හිනා යන්න වගේ , බෑ අමරුවෙන් නවත්තගත්තා ඉදගෙන ඉදලා ඒ හරියේ ටිකක් අමරුයි.
අර පෑන ගත්ත අයියා ඌට ෂීට් එක නුදුන්න එකට අප්සට් එකේ මට එරෙව්වා.

මූ යුද්දෙට යන ගරිල්ලා භටයා වගේ අර කෙල්ල ගාවට ගියා. අනිවා ඌට පැය බාගයක් විතර යන්නැති එතෙන්ට යන්න. මාත් එක්ක පොර වගේ කිව්වට බයයිද කොහෙද? හි හි.

කෙල්ලගේ මූණත් ටිකක් දැන් සවුත්තුයි වගේ ! අයියා කොහොමහරි ගේම ගහල ලේන්සුව අරකිට දුන්නා. එකි නිකම් බලු බෙට්ටක් ගන්නවා වගේ ඒක ගත්තේ. කොහොමහරි අරු රටක් රාජ්ජයක් දින්න එකා ගානට මා දිහා බලලා හිනා උනා.

මෙන්න මේකි ඊලග හෝල්ට් එකෙන් බැස්සා. කුම්බලා මාලු කැවානම් විදවාපන් බළලෝ!
අනේ ඉතින් මූ ශේප් එකේ අපහු ෂීට් එකට එන්න ටිකක් බලද්දි ආච්චිට වැඩේ මීටර් උනා , ආච්චිත් ක්ෂණික නිද්‍රාවට පත් උනා.

මං තොට යස කියලා මැසෙජ් එකක් දැම්මා, අයිය තිත් දෙකයි පී අකුරයි දාලා රිප්ලයි කොලා. මට ටික වෙලාවකින් ගමන් මහන්සියට නින්ද ගියා.
නිකම් කකුල මීයෙක් කනව වගේ කිති  කැවෙනවා. මං හීනෙන්ම අතගාද්දී ජංගමේ වයිබ්‍රේට් වෙනවා, වයිබ්‍රේට් තාක්ෂණයේ පියගේ මව්තුමිය මතක් කලේ නින්ද කැඩුවට. ගෙදරින් කෝල් කරනවා. රැට කාලා එනවද කියලා?

ඔව් ටවුමේ නානාගේ නයිට් කඩෙන් කොත්තු 2ක් දාලා එන්නම් කියලා තිබ්බා.නිකමට වගෙ අයියා දිහා බැලුවා ඌ පේන්න නෑ, ගල් ආදා ෂීට් එකක් හොයගෙනද කොහෙද?
කොහොමහරි අඩුමකුඩුම ටික අතගාල පොඩ්ඩක් පස්සත් අතගාලා තියනවා කියලා ෂුවර් කරන් බස් එකෙන් බැහැලා නානාගේ කඩේට ගිහින් කොත්තු 2ක් ඕඩර් කලා.
අර කැල්ලගේ සීන් එක එහෙන්ම අපි දෙන්නටම අමතක වෙලා. ටික වෙලාවකින් කොත්තුව කකා ඉද්දි අයියගේ පෝන් එක මෙව්වා වෙනවා. දන්නැති නොම්බරයක්,
" අඩේ අර කෙල්ලද දන්නෑ"
"අම්මට උඩු මේ උස්සහන් උස්සල ස්පීකරේ දාහන්"
_________________________________________________________________________________

"හෙලෝ"

ආආ පිරිමි කටහඩක් මගේ හිත කුල්මත් වෙන ගමන් අරුගේ හිත  මෙව්වා වෙනවා දැක්කා.

"හෙලෝ මේ ම___ උ_____ ද? "
"ඔව් කවුද මේ?"
"අර උඹ බස් එකෙදි ලේන්සුවක් දුන්නේ එකිගේ වෙන්න මිනිහා කතා කරන්නේ, ලැජ්ජා නැද්ද යකෝ දකින දකින ගැනිට ලෙන්සු දෙන්න. ඒ මදිවට මේක ගද්ස්සාරේ බෑ,  එකි හිතලා තියෙන්නෙ උබ එකිට ෂීට් එක දෙන්න යනව කියලා, තෝ ආයේ ඒකි පස්සේ ගිහිල්ලා තිබ්බොත් බලා ගන්නම්"

ටී................................

හෙන ගැහුවා වගේ කොත්තුවත් කන්න බෑ වගේ, එහා පැත්තේ බිත්තර ආප්පයක් කකා හිටිය හිගන්නා ආප්ප කෑල්ලක් කටේ තියන් මේක දිහා බලන් ඉන්නවා. උගේ ආප්පේ බිත්තරෙත් බේරෙනවා. ඒත් ගානක් නෑ.
කොත්තුවෙන් තුන්කාලකටත් වඩ කාලා හිටිය නිසා බිල ගෙවලා ක්ෂණික මාරු උනා. ගෙදරට පයින් එන ගමන් අපි දෙන්නට මැරෙනකම් හිනා. අන්තිමට අයියා කිව්වා

"අපි ඉතින් ගහක නැග්ගොත් දෙබලක් බං"

ප/ලි : ලොකු අම්මගේ ලොකු පුතාට කියන නෑදෑ කම මොකද්ද?